1Jo 3 | KYG | STEP | Afiyo, Afotimo'a lagaefe'mo aeto agufa kava huno hau ayamopafi'mo hau'nigeno'ae'mo, Mafa'ne'nimogitapae, huno nehigetae'mo lahau ne'aune. Ma mopafi vaya'mogimo Goti'mo o'age'naya'mofe'mo lagae'e'mo lage'a aeto nosae.

1 John 3

Goti mafa'ne'aife'mo apava gemo hu'niya gemae

1 Afiyo, Afotimo'a lagaefe'mo aeto agufa kava huno hau ayamopafi'mo hau'nigeno'ae'mo, Mafa'ne'nimogitapae, huno nehigetae'mo lahau ne'aune. Ma mopafi vaya'mogimo Goti'mo o'age'naya'mofe'mo lagae'e'mo lage'a aeto nosae. 2 Nahau'niya vaya'mogitapae, hemenimo Goti mafa'ne'amo mai'nonanageta henaga'amo haiya agufa vaya'mo maisupi, huta o'afi'nona'monanafa agaemo emineno afole ne'aisigetae'mo agaekana huta maigune, huta afi'none. Haiya agufa vekamo mai'nifi, huta ageta aeto huguna'mofe'mo agaekana huta maigune. 3 Muki vaya'amogimo, ani kava'mo afole aigiye, hu'a hute'a agava mai'ne'a apamogaga ne'aiya vaya'mo apaikai'apimo sese hu'a ne'apatae. Agaemo yaveyave'age aipa'e vekamo mai'niyanage'a agaekana hu'a maisayafe'mae.

4 Hosu kava'mo nehaya vaya'mogimo Goti ke'aepa ge'amo ago amagi'a ne'atalae. Hosu kava'mo Goti ke'aepa ge'amo amagi'a ne'atalaya kava'mo hane'niye. 5 Lapakaemo ago afi'nayana Kalaisi'a hosu kavatimo alino atalesiyafe'mo emineno afole ai'niye. Agai'a aipafi'mo hosu kava'amo alagi ohane'niye. 6 Muki vaya'mogi agaepi'mo alagi mai'nisaya vaya'mogimo hosu kava'mo nosae. Hosu kava'mo nehaya vaya'mogimo Kalaisi'a o'agege age'a aeto osuge hu'nae.

7 Aise mafa'ne'nimogitapae, fiku yanagetapa apate'nisage'a humi lapategayanagi. Kalaisi'a fatago vekamo mai'niya kava hu'a alagepa kava'mo nehaya vaya'mo fatago vaya'mo mai'nae. 8 Satani'a aepa fai'niya afinateti'mo hosu kavake'mo hume hume ne'eya kava hu'a muki vaya'mogi hosu kava'mo nehaya vaya'mo Satani vaya'amo mai'nae. Goti Mafa'ne'amo'mo Satani ali'ya'amo alagi alino hano huno atalesiyafe'mo emineno afole ai'niye. 9 Ina lagimo Goti'a alino apate'nifi Goti avina ya'amo apaipafi'mo hane'niya'mofe'mo hosu kava'mo akame nosae. Goti'a alino apate'niya'mofe'mo apakaemo hosu kava'mo alagi akame osugae. 10 Muki vaya'mogi fatago kava'mo nosaya vaya'mo Goti mafa'ne'amo o'mai'nae. Konaga'apie'mo nohapaiya vaya'mogimo ani kava hu'a Goti mafa'ne'amo o'mai'nae. Ani kavateti'mo Goti mafa'nemo mai'nafi Satani mafa'nemo mai'nafi hu'a apakesaya kava'mo hane'niye.

Konagatapie'mo lapaino, huno hu'niya gemae

11 Lapakaemo aepa fai'naya afinateti'mo, konagatapie'mo lapau lapayamopafi'mo lapaino, huta lapa pai'nonagetapa afi'nae. 12 Kenikana huta o'maisuna kava'mo hane'niye. Keni'a hosu vekamo mafa'ne'amo mai'neno agana'amo'mo amagi'nigeno fali'niye. Na kava higeno kamiti amagi'niye. Keni'a hosu kava'mo hu'nigeno agana'amo'mo fatago kava'mo hu'niya'mofe'mo kamiti amagi'nigeno fali'niye. 13 Konaga'nimogitapae, ma mopafi vaya'mogimo apaini hu'a lapatesagetapae'mo lapau o'aiyo. 14 Lagaemo konagatie'mo lahau layamopafi'mo nelahaiya'mofe'mo ago afi'nonana nefaliya kavategati'mo ago ataleta eta afa'a ne'maiya kavategamo ne'maune. Konaga'apie'mo hapau apayamopafi'mo nohapaiya vaya'mo nefaliya kavategamo alagi ne'maiye. 15 Konaga'amofe'mo aini huno ne'ateya vekamo'a konaga'amo'mo kamiti ne'amagiya vekagana huno mai'niye. Lapakaemo ago afi'nayana kamiti ne'apamagiya vaya'ai apaipafi'mo maige maige hu'a ne'maiya ya'mo alagi nohane. 16 Yesu'a afa'a ne'maiya ya'amo lagaetefe'mo atale'niya'mofe'mo lagaefe'mo hau ayamopafi'mo hau'niya kava'amo age'nonanageta ani kava huta konagatimogitefe'mo afa'a ne'mauna yatimo atalesuna kava'mo hane'niye. 17 Hane'niya'monanafa mago vekamo'a hapa maesiya ya'amo hane'niya vekamo'a agesiyana mago konaga'amo'mo kafu huteno mai'nisigeno ageteno'ae'mo hau huno ateteno o'ami'nisiyana Goti'a hau ayamopafi'mo hau'niya agufa kava'amo aipafi'mo hane'nifiye. 18 Aise mafa'ne'nimogitapae, lavaya'aletike'mo ge'ageke'mo hutae'mo, lahau layamopafi'mo nelahaiye, huta osuta alagi lama ge huno lahau layamopafi'mo lahau'ninageta alagepa kava'mo higetao.

Goti aulagale'mo koli nosaya vaya'aife'mo apava gemo hu'niya gemae

19 Ani kavateti'mo ago age'nonana lama ge vaya'amo mai'nona'mofe'mo laipamo'mo falu hu'nisigeta Goti aulagale'mo atete osugune. 20 Yu'ilaga mafa'netimo'a, hosu kava'mo nehae, huno nehisigeno'ae'mo Goti'a yu'ilaga mafa'netimo ago aeno agaseno muki kavatimo age'niye. 21 Nahau'niya vaya'nimogitapae, Yu'ilaga mafa'netimo'a hosu kava'mo nehae, huno nosisiyana lagaemo Goti'a laha maegaiye, huta ago afi'none. 22 Lagaemo ke'aepa ge'amo akame nehunageno'ae'mo amuse huno nelateya agufa kava'mo nehuna'mofe'mo aukaya nehunageno'ae'mo alino nelamiye. 23 Goti ke'aepa ge'amo'mo huno'ae'mo, mafa'ne'nimo Yesu Kalaisi agi'alefe'mo lapakesa afita fatago nehutapae'mo konagatapimogife'mo lapaino, huno laha pai'niye. 24 Muki vaya'mo ke'aepa ge'amo akame nehaya vaya'mo Gotipi'mo alagi mai'nageno apakaepi'mo alagi ne'maiye. Ani kavateti'mo ago age'nonana Goti'a alino lami'niya Auneme'aleti'mo lagaepi'mo alagi ne'maiye.